إيمان دعبل
فراشةٌ في دهشة الضوءأرشيف لـعطرُ الحكايا من قنينة عشق
أبفهم بس!!
أبفهم بس!!
أبفهم بس من حرك شعورك غيري هالساعة
أبعرف من ترى غيري سكن في قلبك ابهلآن ؟
شغل فكرك وأحاسيسك وقلبك غير أوضاعة
سلب مني الحبيب اللي حسبت إنه بيديني كان
أبفهم بس وشلون الي يغليك إنت بياعه
وهواي شلون ياخلي عليك بهالسهولة هان
هديتك روحي وعمري ونفسي دوم منصاعة
ويوم إنت تهاديني تجيني جايب الأحزان
وتكسر خاطري وقلبي يفز من بين أضلاعة
تراني مو حجر والله في داخل هالجسد إنسان
وأحس بغصة من أبلع شجوني وآهي ملتاعة
ولواهيب القلب نار وهواجيس الفكر بركان
تعبت سنين وآنه ابني وهدمت أحلامي بساعة
حرام اللي بنيته بروحي يتحطم ..حرام انهان
تعبت أشعل أصابيعي شموع ودوم مطواعة
طفيت النور في دربي وصفيت أتعثر بدخان
تعبت أوسدك خدي مداس وعمري شماعة
تحملني همومن ما هي بوسعي ولا بالإمكان
تعب قلبي حرام تزيد يا محبوبي أوجاعه
يليت الموت ماخذني ولا كان الذي هو كان
غريب اللي حصل فجأة وش اللي غير أطباعة
عجزت سنين أتوسل ولا تغير ولا هو لان
عجيب شلون غافلني وقلبي سد أسماعة
وعيت وما لقيت إلا حياتي في خبر من كان
أحس بغيرة تملكني وأحس يا عمري مرتاعة
أخاف أتخيلك عاشق لغيري وهايم وولهان
ومدري وش كثر قلبي بيتحمل من أوجاعة
أخاف بيوم نتفرق أخاف وخافقي حيران
وصدقني مهو بوسعي أحس بروحي ملتاعة
وضاقت هالوسيعة بي وضاقت كل هالأكوان
وصدقني أحبك موت وقلبي إنت إيقاعة
ولو ترهف لنبضاته بتسمع اسمك الألحان
اصبر يا قلبي
أصْبر يـ قلبي وانتظر خل الحزن مكتوم
كل المعاني تغيرت واتضحت الصورة
صار الصِّدِق في هالزمن مثل الوفا معدوم
وجروحنا ما تندمل والفرح مكسورة
كل المبادئ تنشرى واللي معاه يسوم
حتى المشاعر ارخصت والعفة مهدورة
الحب تلاشى والهوى من شوفته محروم
عطشان يدور في سراب بروح مهجورة
حسرة علينا ننتقل من هم نلاقي هموم
وأحلامنا مثل الرمل في الريح منثورة
هذي الحياة والقدر في كفوفنا مرسوم
كل اللي باقي ألم وقلوب مقهورة
سقط القناع ~
حكايات الحزن عندي بِدت قطرة
وبعدها تكاثرت ليما امتلى بها الكاس
سقاني المر وكنت امشي على أمره
عزف لحنه على نبضة وتر حسّاس
خدعني برقته وفيها خفى مكره
وصدّقت اني في قلبه أعز الناس
وانا اللي في الأصل ما همني أمره
تراجعت وعطيته الروح والأنفاس
وقلت فظني يستاهل كفو ويسوى
طعني فظهري الخاين بلا إحساس
تنكّر بالوفا وتقمص الفكرة
وهو كله غدر من راسه ليما الساس
سقط لقناع ما في داعي لكسره
ومو كلّ الذي يلمع ذهب والماس
يكفي اختلاج الرمش
جاري شِغل بالي بنظرة عيونه
مدري سحرني لو أسرني بعناده
أطلق شعوري من مجاهل سجونه
مثل الطفل يِصرخ ابوقت الولادة
مثل الجمر شوقي صحا من كمونه
من بعدما طالت سنين انخماده
لو بس يرمش هام قلبي بفتونه
وشلون لو يغمز ويزيد بوداده
احضني بجفونك بـ ضمه حنونه
وارسمني في كحل (ن) أهيم بسواده
جاري كلام العين سري يخونه
يكفي اختلاج الرمش ..يكفي وزيادة
ويشهد الزرنوق
تذكر مواعيد الغرام بظلمة الزرنوق
وما غير عينك تلمع بعيني مثل لبروق
تهمس بلهفة يا بعد عمري وقلب محروق
والشوق
شنهو الشوق
رجفة تلهب بلعروق
تذكر تغازلني
وبيدك تنتفض إيدي
وآقول لك بس عيب
وآنه من العشق ما افوق
أسحبها وأركض
جني كنت بهالمكان آبوق
وتقول أحبج
و الفرح يتوهج بدمي
ويحمر خدي من الحيا مثل الفنر معلوق
وأركض
وهم نبضي فرس يتراكض بصدري
والضحكة تصهل على شفافي
ويشهد الزرنوق
ولا يشوفوني عريانة
أغلّف حزنـي بالبسمـة
وامثـل إنـّي فرحانـة
قنـاع اتفنـن برسـمـه
وأزخرف قولي بألوانـه
واداري همـي بكتـمـه
عن الناس اللي شمتانـة
واجابهـم بكـل هـمـة
ولا يشوفونـي عريانـة
واظل فعيونهـم نجمـة
لها وهـج عـلا شانـه
ولو ضعفي صعب هزمة
ودمعـي زاد عصيانـه
أصَبّـر نفسـي بــ اسمـه
تعالـى ربـي سبحانـه
حياتي سر صعب فهمـه
وأنا بأوجاعـي غرقانـة
وحملي من كبر حجمـه
كيانـي اختـل ميزانـه
وحيدة وارتجـي كلمـة
تهدي قلبـي وأشجانـه
مثل بحـار فـي عتمـة
يـدور فيهـا شطئـانـه
يدور فيها عـن حلمـه
وهو محبوس في دانـة
فحضن محـارة اتلمـه
فبحر مجهولـة قيعانـه
ولكن مـا فقـد عزمـه
وسلاحـه كـان إيمانـه
مرسال العشق
كنت مرسال العشق
بين جارتي أحلى البنات..
وبين فارسها المتيم في هواها…
كان يطرشني بمكتوب الهوى
وبوسة..
وسلام..
وينتظر ملهوف يتمنى رضاها..
ولي رجعت
يسألني ألف مليون سؤال
جنة في ظلمة يدور عن ضواها..
كنت أقوله يا حلاها
وهي تدللني عشان أقعد معاها
هم بعد تسألني عنك
عن حياتك
عن شعورك
عن تباريحك وشوقك..
كانت بغصة تقول
إنت علتها ودواها
وإنت فرحتها وغضاها ..
وتِّــساءل
قوله باقي عالوعد والله نساها؟
سِكت والدمعة فعيونه
والحزن كله غشاها
قالي اسمع يالصغير
هالوعد حلمي اللي ينبت في ضلوعي
مثل سدرة..
مدت جذور الوفا بين العروق
من يداعبها الهوى أرجف ويتورد غلاها
حبي مو بس كلمة تتردد على شفافي بفتور
حبي يشهد له الشعور
هذي مو بس آنه أحبها
هذي قلبي اللي بغاها
قصدي شريف
معذور قلبي لي خفق مثل الجناح وطار
مـ أقدر أهدي رجفته لي طلّت عيونك
ما أبدع احساسي إذا دمي فعروقي ثار
وشلون أقاوم هالسمار الحلو في لونك
كلما خفض طرفه بحيا شبت بجوفي النار
زيد بدلالك يالقمر وامشي على هونك
تاري العشق ما هو سهل كله وجع وأسرار
تسلب شعوري من تمر واصير مفتونك
مو بس جمالك شدني فيك الوصف محتار
خوفي من عيون البشر باجر يحسدونك
زين الشمايل زادني حبك أمل و إصرار
مـ أقد أعيش بدنيتي يا حلمي من دونك
ما ني مثل باقي الربع همي اللعب يا جار
قصدي شريف ولا تظن آخيب ظنونك
أحلف لك إنك منيتي من يوم كنا صغار
باجر بخلي أميمتي وأهلي يخطبونك
أحلم يغالي نجتمع وتضمنا أجمل دار
وا شوفك بثوب العرس حقي يزفونك
غواية الابتسام
مثل ورد تدلى من عقود الغصون
يبتسم لي ويبعث بالشذى لي رسوله
تنتشي بعطره روحي ..تشتهية العيون
حار فكري وأنا اسأل كيف أقدر أطوله
كيف أقدر اهدي لهفتي والفتون
وانتزع شوق قلبي من عوالم ذهوله
كيف حلمي تفجر من خفايا الكمون
بعدما كان غافي في حياة كسولة
كل ما بي تغير واستحال السكون
ثورة في عروقي من عيونٍ خجولة
كل نبضة في قلبي ترتعش في جنون
لو خطا بين وردٍ ينتعش من ذبوله
ما أبي غيره يمي في حياتي يكون
انتظر ري روحي من عذوبة هطوله
